seMANA santa: ang taunang pagpapako sa krus sa kapitangan

By: Jamie Hernandez and Aaron San Mateo

Taun-taong tradisyon na sa barangay ng Kapitangan sa bayan ng Paombong ang pagpapako sa Krus tuwing sasapit ang Semana Santa. Taun-taon din ay dinarayo ito ng mga taga-ibang bayan, maging sa ibang probinsya at maski ang mga dayuhan nagbabakasyon sa bansa.

Si Manong Erik, 34 apat na taong gulang at residente ng Kapitangan ay nasa ika-apat na taon na ng pagpapapako. Ayon sakanya, nagsimula ang panata niya noong nanaginip siya at sa pag-gising niya ay alam niya ng kaya niya ang magpapako sa krus.

"Kasi kaya ko naituloy to ay dahil lang din sakanya [Diyos] ang salita ko sakanya kung dapat lang iatang mo sakin to tatangapin ko para sa pamilya ko," ika ni Mang Erik

Kasabay ng kanyang pamamanata ay ang kanyang dalangin sa kalusugan niya at ng buong pamilya niya.

"Basta ang lagi ko lang dalangin sa sarili ko, wag lang magkasakit 'yong mga anak ko [at] buong pamilya ko," saad niya.

Ang pakong ginamit niya, ay ang pako ring kanyang unang ginamit apat na taon na ang nakalipas. Gaya ng ibang mga namamanata, ay parehong pako ang kanilang ginagamit sa kanilang debosyon. Ayon kay Mang Erik, ang paggawa ng mga pako ay naging panata na din ng mga gumagawa nito.

“‘Yong langis na pinaglalagyan [ng mga pako], galing doon sa simbahan  ng Kapitangan. Hindi na namin inilalagay sa alcohol kasi para sa amin, sapat na ‘yong mabendisyunan para maayos [gamitin] ‘yong mga pako,” aniya.

Pagkabunot naman ng pako ay hindi na nila ito kinakailangang dalhin sa ospital, dahil naniniwala siya na sapat na ang debosyon at paniniwala niya upang siya'y gumaling. Ang krus na kanyang binubuhat naman ay nagtitimbang ng isang daan (100) mahigit.

“Sa amin oras na pagkabunot, dinadasal na lang kasi para sa amin, sapat na nga ‘yong debosyon, ‘yong paniniwala kasi wala namangibang magpapagaling sa sarili ko kundi Siya lang. Ang dalangin, Siya lang naman ang nagpapagaling sa akin kaya ba’t pa ako pupunta sa ospital? Mabilis lang naman gumaling [‘yong sugat].”

Paglilinaw din ni Mang Erik na walang kinalaman ang pari sa mga ginagawang tradisyon sa nasabing barangay.

“Kasi diyan sa Kapitangan, tradisyon na talaga ‘yan. Simula no’ng bata pa ako, tradisyon na talaga ‘yan. Ang nasusunod kasi diyan, ang taong-bayan, ‘yong mismong namamanata talaga. Hindi nangingialam ‘yong mga pari sa amin kasi alama nila kapag nangialam sila doon, papalitan agad sila. Kasi taong-bayan talaga ang namamahala sa [tradisyon] sa Kapitangan.”

Samantala, ang namamanata na si Mang Erik ay ipinako sa Krus ngayong araw ng Huwebes Santo sa Anilao, Pampanga ganap na 11:30 ng umaga.

Nagkaroon rin siya ng mensahe sa mga hindi Katoliko na huwag na lamang silang mamula o mamuna dahil iba iba tayo ng paraan ng pamamanata.

"Ang mensahe ko lang sakanila lalong lalo sa mga taong hindi katoliko, kasi iisa lang naman tinitingnan natin wag nalang silang mamula," saad niya.